A fala
O idioma é a chave
Coa que abrimos o mundo:
O salouco máis feble,
O pensar máis profundo.
O idioma é a vida,
O coitelo da dor,
O murmurio do vento,
A palabra de amor.
Aiala lala…
O idioma é o tempo,
É a voz dos avós
E ese breve ronsel
Que deixaremos nós.
O idioma é un herdo,
Patrimonio do pobo,
Maxicamente vello,
Eternamente novo.
O idioma é a forza
Que nos xungue e sostén.
¡Se perdemos a fala
Non seremos ninguén!
Renunciar ao idioma
É ser mudo e morrer.
¡Precisamos a lingua
Se queremos vencer!
Autor(es): Manuel María, Uxía Senlle, Sérgio Tannus
