De vrijgezelle-aovend
Wie Johnny wow goon trowwe met e meidske oet de straot
't Waor sinds jaor en daag al ziene beste kammeraod
E fien en aordig snuutske, klein vaan stok en zoe sjarmant
Veur Johnny zonneklaor 't sjoenste vaan 't land
Meer Johnny had ouch vrundsjes vaan 't mannelek geslach
Heer wis die hobbe vas get ammezants veur miech bedach
Ze hadde e leuk vrijgezellefeeske opgezat
Ze vierde dat neet toes mer liever in de stad
En Johnny zag 'tis good, iech gaon wel met
Mer neet te lang, want iech wil vreug nao bed
Want morge moet iech op d'n altaar stoon
Want morge moot iech trowwe goon
Want morge is 't vrijgezel gewees
Heer strort ziech in 't oongeluk dus hawwe veer e fees
Want morge is dee sjoene tied gedoon
Dus laote veer venaovend pierewejje goon
En Johnny dach iech daon mien allersjoenste kleijer aon
't Pak boemet iech zoondag altied nao de kerrek gaon
De door mam gebreide jumper, de door pap gepotste sjeun
De haore good gewasse, daonao in de fohn
Mer Johnny woort getakeld in 't vrijgezellepak
De errem zaote ruim allein de batse zoate strak
'n Korte brook, 'n lang krevat, e motske op de kop
"vandaag ben ik nog happy" had 'r achterop
En Johnny zag zoe loup iech toch veur paol
Me vint dat vas en zeker e sjendoal
Want morge moet iech op d'n altaar stoon
Want morge moot iech trowwe goon
Ze ginge caffee in en caffee oet tot 's aoves laat
en Johnny woort zoe langzaamaon e bitsje knetterzaat
Heer dach dit is pas ech gelok, iech sjriew 't vaan 't daak
't Vrijgezelleleve is de sjoenste zaak
Mer Johnny kreeg gei woord mie oet de moond
En lallentere veel 'r op de groond
Mer morge moot 'r op d'n altaar stoon
Mer morge moot 'r trowwe goon
