Ca' The Yowes
Ca' the yowes tae the knowes
Ca' them where the heather grows
Ca' them where the burnie rowes
My bonie dearie
As I gaed doon the water-side
There I met my shepherd lad
He row'd me sweetly in his plaid
And he ca'd me his dearie
Will ye gang doon the water-side
And see the waves sae sweetly glide
Beneath the hazels spreading wide
The moon it shines fu' clearly
I was bred up in nae sic school
My shepherd lad, to play the fool
An' a' the day to sit in dool
An' naebody to see me
Ye sall get gowns and ribbons meet
Cauf-leather shoon upon your feet
And in my arms ye'll lie and sleep
An' ye shall be my dearie
If ye'll but stand to what ye've said
I'se gang wi' you, my shepherd lad
And ye may row me in your plaid
And I shall be your dearie
While waters wimple to the sea
While day blinks in the lift sae hie
Till clay-cauld death sall blin' my e'e
Ye sall be my dearie
Ca' the yowes tae the knowes
Ca' them where the heather grows
Ca' them where the burnie rowes
My bonie dearie
