Nun è Carmela mia

Si mme vulite bbene,
nun mme parlate 'e chella!
Tutta truccata e bella
nun 'a cunosco cchiù.
Nun è Carmela mia
chella ca mo è turnata.
No, nun è chella, è 'n'ata!
Nn' 'a voglio cchiù vedè.

Poveru core mio,
chella è turnata pe' te fà dannà.
Dille pe' ssempe "addio"!
S'è avvicinata pe' s'alluntanà.
Mo s'ha cagnato 'o nomme,
nun tene 'a stessa voce,
mo tene 'a vocca doce.
Te mette 'ncroce,
te fa murì.

Carmela nun teneva
oro, pperle e brillante,
cappielle 'e lusso, guante,
ll'uocchie pittate blu.
Carmela era 'na santa,
tanto 'na bona figlia.
Partette pe' Marsiglia
pe' nun turnà maje cchiù.

Poveru core mio,
chella è turnata pe' te fà dannà.
Dille pe' ssempe "addio"!
S'è avvicinata pe' s'alluntanà.
Mo s'ha cagnato 'o nomme,
nun tene 'a stessa voce,
mo tene 'a vocca doce.
Te mette 'ncroce,
te fa murì.